As accións que se presentan a seguir representan os elementos operativos que se veñen levando a cabo no Concello de Santiago de Compostela desde 2016 e que van na liña da Axenda 2030. Cómpre advertir que non é unha relación exhaustiva, senón que pretende ser unha mostra representativa das que concordan cos ODS e coas metas que marca a devandita axenda, na que se sinala, para cada caso, a que obxectivos contribúen.
Son accións de diferente natureza: de sensibilización e educación, de carácter normativo, relacionadas co financiamento, subvencións e incentivos fiscais, realización de estudos, accións de xestión, sobre equipamentos e infraestruturas, e de integración de criterios no planeamento urbanístico, entre outras, e abordan diversos ámbitos da xestión municipal.
Presentamos as accións agrupadas en catro ámbitos temáticos: persoas, prosperidade, planeta e paz e alianzas. Se ben, hai que ter en conta o carácter transversal de moitos dos ODS, polo que ofrecemos a posibilidade de facer unha consulta por ODS para ver que accións contribúen a cada un deles.
O 25 de xuño de 2020 o Concello de Santiago aproba en Pleno o inicio das tarefas de posta en marcha da Axenda Urbana 2030 para Santiago de Compostela coa análise da situación e coa elaboración dun plan de localización e implementación dos ODS da Axenda 2030 así como a adhesión á «Rede de entidades locais para a Axenda 2030» impulsada pola Federación Española de Municipios e Provincias (FEMP), sumándose así a este movemento global.
Ademais o 8 de abril de 2021 asínase o protocolo entre a Secretaría xeral de Axenda Urbana e Vivenda do Ministerio de Transportes, Mobilidade e Axenda Urbana, e o Concello de Santiago no que se recolle a colaboración entre ambas entidades para a realización dun Plan de acción por parte da entidade municipal que sirva de proxecto piloto para outros municipios no ámbito da Axenda Urbana Española. A Axenda Urbana Española, tomada en consideración polo Consello de Ministros o 22 de febreiro de 2019, é a folla de ruta que vai marcar a estratexia e as accións a levar para facer dos pobos e cidades ámbitos de convivencia amables, acolledores, saudables e concienciados. É tamén unha política con capacidade de acelerar a implementación dos Obxectivos de Desenvolvemento Sostible (ODS) en todas aqueles fitos que ten unha compoñente territorial e urbana e, en particular, o ODS 11 sobre cidades sostibles, inclusivas, seguras e resilientes. Constitúe un verdadeiro «menú á carta» para que todos os actores, públicos e privados, que interveñen nas cidades e que buscan un desenvolvemento equitativo, xusto e sustentable desde os seus distintos campos de actuación, poidan elaborar os seus propios plans de acción.
