TRABALLO DECENTE E CRECEMENTO ECONÓMICO

No ODS 8 poden ser metas de referencia local: 8.1, 8.2, 8.3, 8.4, 8.5, 8.6, 8.9 e 8.B

8.1 Manter o crecemento económico per capita consonte as circunstancias nacionais e, en particular, un crecemento do produto interno bruto de polo menos o 7% anual nos países menos adiantados.

8.2 Lograr niveis máis elevados de produtividade económica mediante a diversificación, a modernización tecnolóxica e a innovación, entre outras cousas centrándose nos sectores con gran valor engadido e un uso intensivo de man de obra.

8.3 Promover políticas orientadas ao desenvolvemento que apoien as actividades produtivas, a creación de postos de traballo digno, o emprendemento, a creatividade e a innovación, e fomentar a formalización e o crecemento das microempresas e das pequenas e medianas empresas, mesmo mediante o acceso a servizos financeiros.

8.4 Mellorar progresivamente, de aquí a 2030, a produción e o consumo eficientes dos recursos mundiais e procurar desvincular o crecemento económico da degradación do medio, de acordo co Marco decenal de programas sobre modalidades de consumo e produción sostibles, empezando polos países desenvoltos.

8.5 De aquí a 2030, lograr o emprego pleno e produtivo e o traballo digno para todas as mulleres e homes, incluídas as persoas mozas e con discapacidade, así como a igualdade de remuneración por traballo de igual valor.

8.6 De aquí a 2020, reducir considerablemente a proporción de mozas e mozos que non está empregada e non cursa estudos nin recibe capacitación.

8.7 Adoptar medidas inmediatas e eficaces para erradicar o traballo forzoso, poñer fin ás formas contemporáneas de escravitude e á trata de persoas e asegurar a prohibición e eliminación das peores formas de traballo infantil, incluído o recrutamento e a utilización de nenos soldados, e, de aquí a 2025, poñer fin ao traballo infantil en todas as súas formas.

8.8 Protexer os dereitos laborais e promover unha contorna de traballo seguro e sen riscos para todas as persoas traballadores, incluídas as migrantes, en particular as mulleres migrantes e as persoas con empregos precarios.

8.9 De aquí a 2030, elaborar e poñer en práctica políticas encamiñadas a promover un turismo sostible que cree postos de traballo e promova a cultura e os produtos locais.

8.10 Fortalecer a capacidade das institucións financeiras nacionais para fomentar e ampliar o acceso aos servizos bancarios, financeiros e de seguros para todas as persoas.

8.A Aumentar o apoio á iniciativa de axuda para o comercio nos países en desenvolvemento, en particular nos países menos adiantados, mesmo mediante o Marco integrado mellorado para a asistencia técnica aos países menos adiantados en materia de comercio.

8.B De aquí a 2020, desenvolver e poñer en marcha unha estratexia mundial para o emprego das mozas e mozos e aplicar o Pacto mundial para o emprego da Organización Internacional do Traballo.