No ODS 1 poden ser metas de referencia a nivel local: 1.1, 1.2, 1.3, 1.4 e 1.5

1.1. De aquí a 2030, erradicar para todas as persoas e en todo o mundo a pobreza extrema (actualmente considérase que sofren pobreza extrema as persoas que viven con menos de 1,25 dólares dos Estados Unidos ao día).

1.2 De aquí a 2030, reducir polo menos á metade a proporción de homes, mulleres e nenos e nenas de todas as idades que viven na pobreza en todas as súas dimensións consonte as definicións nacionais.

1.3 Poñer en práctica no ámbito nacional sistemas e medidas apropiadas de protección social para todas as persoas, incluídos niveis mínimos e, de aquí a 2030, lograr unha ampla cobertura das persoas pobres e vulnerables.

1.4 De aquí a 2030, garantir que todos os homes e mulleres, en particular pobres e vulnerables, teñan os mesmos dereitos aos recursos económicos, así como acceso aos servizos básicos, á propiedade e ao control da terra e doutros bens, á herdanza, aos recursos naturais, ás novas tecnoloxías apropiadas e aos servizos financeiros, incluído o microfinanciamento.

1.5 De aquí a 2030, fomentar a resiliencia das persoas pobres e das persoas que se atopan en situacións vulnerables e reducir a súa exposición e vulnerabilidade aos fenómenos extremos relacionados co clima e a outras perturbacións e desastres económicos, sociais e ambientais.

1.A. Garantir unha mobilización importante de recursos procedentes de diversas fontes, mesmo mediante a mellora da cooperación para o desenvolvemento, co fin de proporcionar medios suficientes e previsibles para os países en desenvolvemento, en particular os países menos adiantados, para poñer en práctica programas e políticas encamiñados a poñer fin á pobreza en todas as súas dimensións.

1.B. Crear marcos normativos sólidos no ámbito nacional, rexional e internacional, sobre a base de estratexias de desenvolvemento en favor dos pobres que teñan en conta as cuestións de xénero, co fin de apoiar o investimento acelerado en medidas para erradicar a pobreza.