No ODS 2 poden ser metas de referencia local: 2.1, 2.3, 2.4 e 2.5

2.1 Para 2030, poñer fin á fame e asegurar o acceso de todas as persoas, en particular das pobres e vulnerables, incluídas as lactantes, a unha alimentación sa, nutritiva e suficiente durante todo o ano.

2.2 Para 2030, poñer fin a todas as formas de malnutrición, incluso logrando, como moi tarde en 2025, as metas acordadas internacionalmente sobre o atraso do crecemento e a emancipación dos nenos e nenas menores de 5 anos, e abordar as necesidades de nutrición das adolescentes, as mulleres embarazadas e lactantes e as persoas de idade.

2.3 Para 2030, duplicar a produtividade agrícola e os ingresos das persoas produtoras de alimentos en pequena escala, en particular das mulleres, dos pobos indíxenas, das persoas que se dedican á agricultura familiar, ao pastoreo e á pesca, entre outras cousas mediante un acceso seguro e equitativo ás terras, a outros recursos de produción e insumos, coñecementos, servizos financeiros, mercados e oportunidades para a xeración de valor engadido e empregos non agrícolas.

2.4 Para 2030, asegurar a sustentabilidade dos sistemas de produción de alimentos e aplicar prácticas agrícolas resilientes que aumenten a produtividade e a produción, contribúan ao mantemento dos ecosistemas, fortalezan a capacidade de adaptación ao cambio climático, aos fenómenos meteorolóxicos extremos, ás secas, ás inundacións e outros desastres, e melloren progresivamente a calidade do solo e da terra.

2.5 Para 2020, manter a diversidade xenética das sementes, as plantas cultivadas e os animais de granxa e domesticados e as súas especies silvestres conexas, entre outras cousas mediante unha boa xestión e diversificación dos bancos de sementes e plantas de ámbito nacional, rexional e internacional, e promover o acceso aos beneficios que se deriven da utilización dos recursos xenéticos e dos coñecementos tradicionais e a súa distribución xusta e equitativa, como se acordou internacionalmente.

2.A Aumentar os investimentos, mesmo mediante unha maior cooperación internacional, na infraestrutura rural, a investigación agrícola e nos servizos de extensión, o desenvolvemento tecnolóxico e os bancos de xenes de plantas e gando co fin de mellorar a capacidade de produción agrícola nos países en desenvolvemento, en particular nos países menos adiantados.

2.B Corrixir e previr as restricións e distorsións comerciais nos mercados agropecuarios mundiais, entre outras cousas mediante a eliminación paralela de todas as formas de subvención ás exportacións agrícolas e todas as medidas de exportación con efectos equivalentes, consonte o mandato da Rolda de Doha para o Desenvolvemento.

2.C  Adoptar medidas para asegurar o bo funcionamento dos mercados de produtos básicos alimentarios e os seus derivados e facilitar o acceso oportuno a información sobre os mercados, en particular sobre as reservas de alimentos, co fin de axudar a limitar a extrema volatilidade dos prezos dos alimentos.